Nirca Nirmala


Pireu.
Taya kecap kaluar tina léngkah
Alum.
Langit pihujaneun pindah kana raray
Geter sukma kawas hinis dirabut tina tungtung kalbu
Nyérését ngagerih batin sésa panarajang jaman

Témbok-témbok ngaheureutan. Jalan beulah. Langit ragrag
Batu-batu kaluar tina bayah maseuk dada
Sirah bencar. Ceuli totos ku sakeclak cimata
Kecap robah jadi leungeun
Imut ganti ceuceub

Ukur neda hampura basa keclak cimata robah jadi cua
Ukur bisa nyangsaya basa lengkah salira teu mirasa
Sabab ngan ukur Mantenna nu surti kana kacinta

Bandung, 5 Oktober 2010


Boa Lain Boa

Boa isuk atawa géto dunya balik deui kana mangsa lungsurna Adam jeung Hawa
Atawa indit ka mangsa nu burakrakan

Boa isuk atawa géto langit robah pulas jadi kayas
Béntangna eureun tingkariceup béakeun tanaga

Boa isuk atawa géto panon poé leungit panas
Unggal raga taya nu nafas sabab buana teu boga carita

Boa isuk atawa géto cai laut jadi seuneu
Sabab lain boa cinta urang geus katambias di hiji pulo nu euweuh dina péta

Bandung, 5 Oktober 2010


Réalita Cinta

Geuning cinta téh beurat mawana
Sakapeung robah jadi batu cadas
Kalan-kalan jadi parahu emas

Bandung, 5 Oktober 2010



Sabada Soré Tutup

Ngabebela gedur cimata salira
Cua reujeung cinta nyaliara
Batin teu kendat miroséa rasa
Sasat remen panggih jeung peurih

Sabada soré tutup, jurang beuki luang
Matrikeun waas di tiap cadas
Jalan pitapak beuki hieum
Hawa ningkeb nyesek rénghap

Geuning kapalay salira mah lain dunya atawa surga
Geuning kahoyong anjeun mah lain bulan atawa béntang
Tapi merdih neuleuman manah nu kalan-kalan jadi katumbiri rubah warna
Nganti sanubari ngahiji kawas geti nu haat mirosea nyawa….

Bandung, 6 Oktober 2010