karya Arom Hidayat
dimuat di Harian Kabar Priangan, 23 Pebruari 2011


Aya nu ngeleleper niiran haté
Nitip kecap ka gedong saté
Jeung gelebug, jeung gulidag
(Awaking, diudag-diudag)

Aya hariweusweus carita kota
Di incer buta tina peta
Ku sareukseuk, ku sareukeut
(Létah Awaking, ku beuki heureut)

Aya aweuhan karatagan
Ti Sancang, ti Bubat, ti patilasan pati pakusarakan
Lagu leuweung, lagu liwung
(Buhun Awaking, tarurun gunung)

Aya uga natas iga
Palangsiang seuweu siwi nembang peura
Tuluy leuit, tuluy leungit
(Jempling hariring Awaking)

Bandung, 2011