- galindeng hujan -
tepung deui
jeung hujan soré ieu
siga kamari
tutas maluguran ti langit
anteng ngeyembeng
minuhan lemah
sok resep
mapay gurat hujan
ngagaléntoran daun
ngusapan dahan
nyarakclakan
maseuhan tangkal
terus kagémbang
lamun hujan lekasan
haté milu baseuh
laju ngamalir ka anjeun
ngeyembeng dina sawangan
nyarakclakan lebah lamunan
(2011)
- 'nu nyésa tutas hujan -
gurat hujan
ti rincik ka rincik ngerepan
ngagarenyas hérang nyilanglangan
maseuhan tangkal ti pucuk ka dahan
gurat hujan
ngocor ka landeuhkeun
malidkeun rupa-rupa kalakay
tuluy mendet lebah kamalir peuting
hate mudal;
tiis, rembes citangis
(2010)
- mulang -
hayang mulang
ka lemah indung
mupu cinyusu
ngipuk ciibun
rék néang
ka paku sarakan
sacangkéwok tampian
saampar labuhan bulan
tuluy nyungsi
nganteur diri
ngalongok pasaran
mageran pajaratan
(0411)
Posting Komentar